هو أنا بعمل في نفسي كده ليه ....؟؟؟

سؤال جه في بالي وانا بفكر في حالي

وقلت لنفسي

ليه انا مختلف عن غيري

ليه بحاول اعمل حاجات عارف اني لما اعملها الناس ممكن تنتقدني !!

هو انا ليه بصلي ؟

ليه خمس فروض في اليوم بصليهم ومش مرة واحده لأ ده كل يوم ومش بس كل يوم ده المفروض اكون ناوي اني لحد ما اموت اني مقطعش الصلاة

هو أنا بعمل في نفسي كده ليه ....؟؟؟

وليه لما بدي لحد ميعاد براعي فيه وقت الصلاة يعني بقوله نتقابل بعد الصلاة الفلانية او نصلي في المكان الفلاني ونتقابل ؟ مع ان غيري مش بيفكر كده ممكن يكون مش في دماغه الصلاة خالص

هو أنا بعمل في نفسي كده ليه ....؟؟؟

الانسان فطرته انه ينجذب للطرف الاخر , ليه الولاد نفسهم يتعرفوا ويصاحبوا بنات , وليه انا مش عايز بل ان لو واحده عرضت عليا شيء زي ده أنا الي أرفض !

هو أنا بعمل في نفسي كده ليه ....؟؟؟

ليه الناس بتسمع اغاني وانا ببعد عنها بل أني مش بحب اسمعها ولو لقيتها شغاله أبعد عنها

هو أنا بعمل في نفسي كده ليه ....؟؟؟

ليه الناس ممكن تجري ورا الفلوس الحلال او الحرام وأنا لو جاتني فلوس حرام أرفض وممكن اسيبها في الشارع وامشي !

هو في حد دلوقتي بيقول للفلوس لأ !

طيب اشمعنا انا بقول لأ للفلوس الحرام ؟

هو أنا بعمل في نفسي كده ليه ....؟؟؟

زي واحد صديق لي حكى انه كان راكب تاكسي وماشي في شارع الهرم والسواق كان مشغل في الكاسيت أغاني

فبيقوله لو سمحت اقفل الاغاني

فالسواق قاله واقفلها ليه ؟

قاله عشان حرام

والله السواق قاله : ليه التشدد ده يعني إنت الي صح وكل الكابريهات دي غلط !

اهو ده واحد بياخد بالكثرة يعني لو اكثر الناس على غلط هو زيهم !

هو أنا بعمل في نفسي كده ليه ....؟؟؟

ليه انا لو اشتريت أكل من مطعم مثلاً ولقيت ان الحساب غلط وهو ليه عندي فلوس ليه غيري ممكن يضحك بخبث ويمشي وانا ارجعله واديله فلوسه

هو أنا بعمل في نفسي كده ليه ....؟؟؟

هو انا ليه لو راكب مواصلة والسواق ما أخذتش باله اني مدفعتش الاجرة انا بنفسي الي اقوله انت ليك عندي فلوس ؟

ليه لما اشوف الغلط اقول ده غلط وانصح غيري انه ميعملوش

واقول الحق حتى ولو هيضرني في حين ان غيري بيقولك عيش جبان تموت مستور !

هو أنا بعمل في نفسي كده ليه ....؟؟؟

ليه الشباب في زمانا ممكن دمعة تنزل من عينه عشان بنت أو عشان اغنية أو عشان مشهد في فيلم !

وانا عيني تنزل منها الدموع والدموع عشان واحد معرفوش في فلسطين والعراق او أي دولة مسلمة
إيه الي خلاني مختلف كده ؟

ليه إختيار الشباب نفسه يقلد فلان وعلان عشان يكون شيك وإستايل وانا بقلد حد تاني خالص

بالنسبة ليه

نجم في السماء

هو أنا بعمل في نفسي كده ليه ....؟؟؟

حاجات كتير اوي أكتر من اني اقدر اذكرها في موضوع

بلاقي ان الواحد بيختلف فيها عن الواقع ومهما اتغير الواقع لازم اكون ثابت على مبادئي

إيه الي خلاني مختلف كده ؟

هو انا اتخلقت بطريقة غير باقي الناس

هو برمجة عقلي وقلبي مختلفة عن باقي الناس !

بالرغم اني عارف اني هكون محط أنظار النقد وعارف ان ناس كتير هتلومني

عارف اني بيتكتب عن واحد زيي في الجرايد والصحف

عارف ان بيتعمل برامج التوك شو عشان يدرسوا حالة واحد زيي

عارف اني بالرغم اني متمسك بالصح في زمن اللاصح هتوصف بأني متشدد ورجعي

في حين اني معملتش حاجة غير الصح ومقلتش حاجة غير الحق !

عارف ان ناس كتير هتفتكرني مجنون عشان بعمل في نفسي كده وتقولك يابني انت فاهم الدنيا غلط !

مش مهم اكون فاهمها غلط المهم اكون فاهم الآخرة صح !

وإجابة السؤال المتكرر

هو أنا بعمل في نفسي كده ليه ؟

الإجابة ببساطة

صحيح أصل انا عايز أدخل الجنة !

والسؤال الي نفسي اطرحه

إيه الي هيضرني لما أعمل كل ده وفي الآخر أدخل الجنه بإذن الله

قال صلى الله عليه وسلم

يؤتى بأنعم أهل الدنيا ، من أهل النار ، يوم القيامة . فيصبغ في النار صبغة . ثم يقال : يا ابن آدم ! هل رأيت خيرا قط ؟ هل مر بك نعيم قط ؟ فيقول : لا . والله ! يا رب ! ويؤتى بأشد الناس بؤسا في الدنيا ، من أهل الجنة . فيصبغ صبغة في الجنة . فيقال له : يا ابن آدم ! هل رأيت بؤسا قط ؟ هل مر بك شدة قط ؟ فيقول : لا . والله ! يا رب ! ما مر بي بؤس قط . ولا رأيت شدة قط

صحيح مسلم

قال رسول الله

( الدنيا سجن المؤمن وجنة الكافر )

صحيح مسلم

وقال صلى الله عليه وسلم

( يأتي على الناس زمان الصابر فيهم على دينه كالقابض على الجمر )

صححه الألباني

كتبه : خيال أي إنسان نفسه يلتزم !

علشان انتى شايف ان ده صح وده حق

فلازم تعمل كده

وقبل ده كله ربنا امرنا بكده

ودى سنة رسوله صلى الله عليه وسلم

شكرا جزيلا لموضوعاتك

بارك الله فيك

» والذي نفسي بيده لا تقوم الساعة حتى تكلم السباع الإنس ، وحتى يكلم الرجل عذبة سوطه ، وشراك نعله ، وتخبره فخذه بما أحدث أهله بعده